Betaler svindyrt for medlemsstraum

23. juni, 2025

Medlemmer av mellom anna LO, Skattebetalerforeningen og ABBL risikerer å betale 30 000 kroner meir enn nødvendig for straumen. – Variable medlemsavtalar burde vore fjerna for lenge sidan, meiner Forbrukarrådet.

Ein gjennomgang frå strømpris.no viser at fleire organisasjonar har medlemmer med variable straumavtalar frå Fjordkraft. Dette gjeld til dømes medlemsavtalane Lofavør Garanti, ABBL Garanti og Skattebetalerforeningen Garanti.  

Prisen på desse straumavtalane ligg skyhøgt over ordinære spotprisavtalar. Til dømes vil du med eit forbruk på 25 000 kWt i året ende opp med å betale over 30 000 kroner meir enn nødvendig.  

— Når organisasjonane tilbyr eigne straumavtalar, burde det vere sjølvsagt at desse avtalane kjem godt ut. Dessverre ser vi at medlemmer med variable straumavtalar har betalt blodpris for straumen, seier direktør Inger Lise Blyverket. 

— Organisasjonane kan ikkje vere kjent av medlemmer med desse avtalane. Forbrukarrådet har fleire gonger bede straumsalselskapa avslutte desse kontraktane. Når dette ikkje skjer, bør organisasjonane sørgje for at medlemsavtalane blir avslutta. 

Dei variable straumavtalane er i all hovudsak tekne ut av aktivt sal, samtidig oppgir NVE at 2,3 prosent av alle hushald framleis står på desse kontraktane. Kor mange av desse som er selde som medlemsavtalar, er vanskeleg å fastslå.

Forbrukarrådet har tidlegare estimert at variable avtalar totalt medførte ein ekstrakostnad for norske straumkundar på over ein milliard kroner i 2024.  

Dagens medlemsavtalar kjem også dårleg ut

Ei rekkje organisasjonar tilbyr i dag også medlemsavtalar baserte på spotpris. Desse kjem atskilleg betre ut enn dei variable straumavtalane som vart tilbodne tidlegare, samtidig finst det billigare avtaler.

— Dei fleste antek truleg at medlemsavtalar er spesielt gunstige, noko dei nødvendigvis ikkje er. Gitt at du har eit forbruk på 25 000 kWt i året, vil du betale meir enn 1 500 kroner i året samanlikna med dei beste avtalane i marknaden, seier Inger Lise Blyverket.

Dette gjeld til dømes avtalane som blir tilbodne av Econa, Naturviterne, Samfunnsviterne og Skattebetalerforeningen i samarbeid med Fjordkraft. LO har også ein slik avtale, men kjem noko rimelegare ut samanlikna med dei andre medlemsavtalane.

— Det er ei smal sak å finne avtalar som kjem betre ut enn desse medlemstilboda. Vi tilrår alle å sjekke avtalen sin på strømpris.no. Her kan det vere mykje å spare for mange, seier Inger Lise Blyverket.