Forbrukarrådet tilrår å fjerne betalingsgebyr for kort og kontantar

26. februar, 2025

Forbrukarrådet går inn for å fjerne gebyr på betaling med kort og kontantar. Dei meiner slike gebyr høyrer fortida til og i praksis fungerer som ein ekstraskatt for dei som står utanfor det digitale fellesskapet.

I dag krev mange verksemder gebyr ved betaling med kort eller kontantar, medan betaling via digitale appar ofte er gratis. Dette skaper ein urettferdig situasjon for forbrukarar som ikkje har høve til å bruke slike appar, meiner Forbrukarrådet.

– Alle forbrukarar, uavhengig av kor digitale vi er, skal kunne betale utan å bli straffa med gebyr. I dag har om lag 200 000 nordmenn ikkje smarttelefon. Så lenge dei ikkje har andre alternativ, fungerer gebyra som ein ekstraskatt på utanforskap. Gebyret har utspelt si rolle, seier Inger Lise Blyverket, direktør i Forbrukarrådet.

Eit unødvendig prispåslag

Ifølgje tal frå Forbrukarrådet oppgir mellom 75 og 90 prosent av norske forbrukarar – avhengig av sektor – at dei vanlegvis betaler digitalt utan problem.

– Gebyra har tidlegare bidrege til å få fleire over på digitale løysingar. No er vi komne dit at det store fleirtalet truleg ikkje vil gå tilbake til ikkje-digitale alternativ, sjølv om gebyra blir fjerna. Samtidig vil eit sårbart mindretal framleis ikkje ha moglegheit til å betale digitalt. For desse fungerer gebyra berre som eit ekstra prispåslag, ikkje som eit insentiv, seier Blyverket.–

Hindrar betaling for billettar og parkering

I rapporten «Forbrukerutfordringer ved betaling av kollektivtransport og parkering» kjem det fram at fleire transportselskap berre tilbyr betaling via app. I enkelte tilfelle blir berre kredittkort godtekne, men ikkje debetkort.

– Mange forbrukarar blir dermed utestengde frå å betale for billettar og parkering fordi selskapa ikkje legg til rette for betaling med kort eller kontantar, seier Blyverket.
 
Forbrukarrådet har gitt si tilråding om å fjerne betalingsgebyrai høyringssvaret til NOU-en «Trygge og enkle betalinger for alle». Utgreiinga frå betalingsutvalet ser på korleis ein kan sikre trygge og inkluderande betalingsløysingar i framtida.