Krev momsgaranti om du kjøper ny el-bil

21. oktober, 2026

Frå nyttår kan det bli dyrare å kjøpe elbil. Forbrukarrådet meiner at bilkjøparar bør krevje momsgaranti når dei bestiller elbil.

I forslaget til statsbudsjett ønskjer regjeringa å redusere beløpsgrensa for momsfritak på nye elbilar frå 300 000 kroner til 150 000 kroner frå 1. januar 2027. Det er planlagt full meirverdiavgift frå 1. januar 2028.

– Med forslaget frå regjeringa må du betale meirverdiavgift på den delen av bilprisen som overstig 150 000 kroner. For ein Tesla Model Y AWD, som er Noregs mest selde bil, betyr det opptil 37 500 kroner i auka meirverdiavgift, seier fagsjef i Forbrukarrådet, Thomas Iversen.

Ulovleg standardavtale

Standardavtalen som blir brukt av bilbransjen legg i dag heile risikoen for auka avgifter på kunden. Forbrukarrådet meiner dette er ulovleg, og har tidlegare klaga avtalen inn til Forbrukartilsynet saman med NAF.

– Vilkåret som gir selskapa rett til å flytte heile kostnaden ved auka avgiftssatsar, også når bilen er forseinka, er openbert urimeleg og er etter vår meining ulovleg, seier Thomas Iversen.

Dette vart også stadfesta tidlegare i år av Forbrukartilsynet, som rettleidde Norges bilbransjeforbund om ulovlege avtalevilkår.

– Det blir fort nyttår, og vi forventar at ein ny standardavtale snart kjem på plass med oppdaterte vilkår som gir større føreseielegheit og vern for forbrukarrettane, seier Thomas Iversen.

– Det må komme klart og tydeleg fram når og kvifor prisen kan aukast. Dersom bilen blir forseinka og nye avgifter blir i mellomtida innført, skal ikkje rekninga sendast til forbrukaren.

Still krav om momsgaranti

Fram til ny standardavtale ligg føre, meiner Forbrukarrådet at bilkjøparar bør stille krav til seljaren om momsgaranti om dei bestiller ny bil i haust, og at nye kundar bør krevje at eventuelle forseinkingar ikkje utløyser krav om auka pris.

– Det er svært mange bilmerke å velje mellom, og konkurransen i nybilmarknaden er hard. Då bør forholda liggje godt til rette for å konkurrere på nettopp pris og føreseielegheit, seier Thomas Iversen.