Press på leigemarknaden skapar utfordringar for studentar

21. juli, 2026

Færre utleigebustader, høgare leigeprisar og stor etterspurnad gjer at mange studentar møter ein svært tøff leigemarknad. Forbrukarrådet fryktar at mange kjenner seg pressa til å takka ja til tilbod dei elles ville valt bort.

Rapportar frå det siste året viser ein tydeleg nedgang i talet på utleigebustader, særleg i Oslo. Samtidig har leigeprisane stige med 29 prosent sidan 2022. Dekningsgraden for studentbustader er òg låg, med berre 15 prosent.

Forbrukarrådet fryktar at den harde konkurransen gjer at mange kjenner seg pressa til å signera ein leigeavtale utan å forstå innhaldet, eller takka ja til ein bustad dei elles ville sagt nei til.

– Når etterspurnaden er større enn tilbodet, aukar risikoen for at leigetakarar tek val dei seinare angrar på. Ei forhasta avgjerd kan bli kostbar dersom du endar opp med ein dårleg bustad eller ein urimeleg kontrakt, seier forbrukarjurist Nora Wennberg Gløersen i Forbrukarrådet.

– Det viktigaste rådet er å halda hovudet kaldt. Ikkje lat frykta for å gå glipp av ein bustad stressa deg til å ta forhasta avgjerder eller skriva under på ein leigekontrakt som ikkje passar for deg.

Dette bør du passe på

Forbrukarrådet oppfordrar alle som skal leiga bustad til å ta nokre enkle forholdsreglar:

• Ikkje lei bustad usett. Sjå bustaden sjølv, eller få nokon du stolar på til å gjera det.
• Les leigeavtalen nøye før du skriv under. Sjekk kva som er inkludert i husleiga, kven som har ansvar for vedlikehald, og kva reglar som gjeld for oppseiing og eventuell bindingstid.
• Alle som skal bu i kollektivet bør skriva under på avtalen. Ikkje skriv under på vegner av andre.
• Krev depositumskonto. Depositum skal alltid setjast inn på ein eigen depositumskonto i namnet til leigetakaren, og aldri på den private kontoen til utleigaren.

Fleire møter budrunder

Ein stadig strammare leigemarknad gjer også at fleire opplever bodrundar på leigebustader.

– At det vert bodrundar om leigebustader, viser kor pressa marknaden er. Risikoen er at mange endar opp med å betala meir enn dei elles ville gjort, og at dei som har minst å rutta med, blir sitjande att som taparar, seier Nora Wennberg Gløersen.

Hamnar du i ein bodrunde, rår Forbrukarrådet deg til å fastsetja ei øvre prisgrense før bodgjevinga startar.

– Set ein makspris og hald deg til han. Gi bod skriftleg og be om stadfesting på at det er motteke. Hugs også at gode referansar og stabil økonomi kan vera vel så viktig som å leggja inn det høgaste bodet, seier Nora Wennberg Gløersen.