SAS og Norwegian laga mest koronatrøbbel for norske forbrukrarar

Forbrukerrådet fikk totalt 51 866 spørsmål fra forbrukere i fjor. 5132 handlet om problemer på grunn av korona. Aller flest gjaldt billetter til reiser, kultur- og idrettsarrangement. Når bedriftene ikke hjelper dem, ringer kundene Forbrukerrådet.

Tryggingsnettet til forbrukarane rakna

Forbrukarrådet fekk dobbelt så mange spørsmål om flyselskap i 2020 som året før, og denne marknaden klatra difor opp til andreplassen på lista over kva norske forbrukarar hadde mest problem med. Av spørsmåla som hadde med korona å gjere, var det klart flest om SAS og Norwegian.

Inger Lise Blyverket er direktør i Forbrukarrådet, og ho er vonbroten over korleis forbrukarane blei behandla.

– Vi er skuffa over korleis styresmaktene sette forbrukarane på pinebenken. Når det gjeld måten selskapa behandla kundane sine på, så skjøner eg ikkje at dei torer. Klare rettar blei brotne, så 2020 går inn i historia som eit kriseår, òg sett med forbrukarauge, konstaterer ho.

Regjeringa varsla nyleg tiltak for å betre tryggleiken for pakkereiseturistar. Blyverket anerkjenner dette, men presiserer at det må gjerast meir for å sikre at forbrukarane får det dei har krav på. Ho fortel at folk opplevde å få avlyst både påske- og sommarferien. Somme hadde betalt mange titals tusen som fly- og reiseselskap ikkje betalte attende då dei skulle.

– Det var ein tøff økonomisk smell for dei fleste. For dei som miste inntekta på grunn av korona, var det krise. 2020 avslørte at tryggingsnettet til forbrukarane rakna då det røynde på. Desse røynslene gjer det naturleg å diskutere om det er trygt nok å betale for reiser på forskot, slik vi gjer i dag, seier forbrukardirektøren.

Norwegian ligg altså øvst på ti-på-topp-lista over selskapa forbrukarane hadde flest koronaspørsmål om, med SAS på ein «sterk» andreplass. Resten av lista er full av reiseselskap, men på sjuandeplassen finn vi SATS. Treningssenterkjeda fekk kritikk for at dei automatisk sette kundane over på digitalt abonnement då dei måtte stengje dørene av smittevernomsyn. Etter dialog med Forbrukartilsynet har kundane seinare fått tilbod om å få att pengane.

Elles er Elkjøp med på lista på ein niandeplass. Desse spørsmåla handla om at kjeda fjerna moglegheita for ope kjøp, altså at kundar kan levere attende ubrukte varer utan å oppgje nokon grunn og få pengane attende.

Bruktbil irriterte mest

Bruktbil har trona på den tvilsame toppen heilt sidan Forbrukarrådet byrja å måle kva folk har mest problem med. Med 5415 spørsmål frå forbrukarane heldt bruktbil på topp-plasseringa sjølv i koronaåret. Handverkartenester har òg klippekort på pallen, og Blyverket har eitt svar på korleis ein kan unngå usemje med både handverkarar og bilseljarar:

– Skriv kontrakt! Om du gjer gode undersøkingar på førehand og så skriv ein tydeleg avtale, aukar du sjansen for å bli nøgd. Du kan bruke kontraktane på forbrukerrådet.no heilt gratis.

Husleige er òg eit tema som går att på forbrukartelefonen. Forbrukardirektøren opplyser at ein god kontrakt òg er viktig når du skal leige deg ein stad å bu, men at dette er ein marknad Forbrukarrådet jobbar for å gjere meir forbrukarvenleg.

– Folk treng tryggleiken som ligg i å ha ein heim, og at den skal halde fram med å vere heime òg på sikt. Heimen er fristaden vår, og han er òg avgjerande for barnehage, skule og nettverk. Mange som leiger bustad i dag, har ikkje den tryggleiken. Avtalane varer for kort tid, og det er for lett for utleigaren å seie opp avtalen. Difor vil vi at husleigelova skal sikre leigetakarane tryggare heimar, avsluttar Inger Lise Blyverket hjå Forbrukarrådet.